بكرا بس يصير عندي ولد، رح علمو ما يسمع كلام الأكبر منو، لإنو في كتير أكبر منو بكونوا حمير وهوي معو حق.
وإبن الجيران يا بابا بس يضربك... ضربو ولو كان أقوى منك وبيطلع حجمو قدك على مرتين... ضربو لإنو ضربك وما تخاف يا بابا...
بكرا بس يصير عندي ولد رح خللي يعرف إنو "بابا" بيغلط... وبس يغلط لازم يعتذر، وإنو هيدا اللي إسمو رئيس جمهورية الله ما خلقو وكسر القالب أزلي أبدي سرمدي... وإنو فينا نغيرو وقت بدنا... وإنو هيدا كمان بيغلط... مش قد بابا... أكتر بكتير.
وبابا هيدا الشب اللي مرتب ولابس أحلى تياب ما بالضرورة تكون أخلاقو عالية، يمكن يكون يا بابا وسخ... ووسخ كتير ف ما تنغر بالمظاهر.
رح قلو لإبني إنو هيدا اللي إسمو "شيخ" واحد كذاب، وإنو إذا بدو يعرف إذا في الله يركز بحصة الفيزيا والبيولوجيا، وإنو "أبونا" اللي بالكنيسة بياكل وبيشرب وبفوت على التواليت، وإنو في يفهم قصة المسيح على ذوقو، ومش غلط إذا حللو نفسيتو لمحمد، وإذا شكك بوجود دايفد مش مشكلة... المهم يشغل مخو.
رح علمو لإبني إنو يكسرلو إيدو للي بحاول ياخد منو (إكرامية) ليخلصلوا معاملة، وإنو إمتحان الدخول بالجامعة يمكن بدو واسطة.. أكيد بدو واسطة.. بس نحنا ما منجيب واسطة، مش لإنو ما فينا، لإنو حقنا نفوت على الجامعة بلا واسطة...
وإنو نحنا بشر، واللي بأميركا وأوروبا بشر، ومش أحسن منّا، وإنو ما يفكر بنهار يروح عسفارة ليزلوه ليعطوه فيزا للهجرة... مش لإنو منّا بعازتن.. ومش لإنو بلادنا حلوة (يمكن أقرف بلاد بلادنا). لإنو منّا أقل منن كبشر، لإنو متل ما هني ما بدن نروح نعيش عندن ما بدنا هنّي يجو يعيشو عنّا...
رح علمو إنو ما كل شخص صار دكتور يعني بيفهم... ومش بالضرورة حتى بالإختصاص تاعو يفهم.... في هيدا الدكتور يكون حمار، وجاية يقيّم تلميذ بحلل قدو على 10 مرات... واردة... ما هيك؟
ورح علمو إنو ما يخاف وقت يوقفوه مسلحين، أو مش مسلحين، ويسألوه لوين رايح؟ رح علمو يقلن: ما خصكن... وبعرف يمكن إخسروا من ورا هلجواب... بس لإنو إبني وبحبو ما رح أرضالو الذل.
رح قلو إنو في شي إسمو إسرائيل، وبوج هيدا الشي اللي إسمو إسرائيل فيك تتحالف مع الشيطان،إن وجد، وحزبو، إذا سمعت فيه. بوج إسرائيل يا بابا كلنا متل بعض، وعشان هيك لازم نكون متل بعض وقت نقاتل إسرائيل.
وبالأخير بس يجي يسألني: بابا مين بكون الحريري؟ رح قلو: يا بابا هيدا واحد نهب البلد، وفقّر العالم، ولو كان بعدو عايش كنا بمؤتمر باريس 3000، هيدا يا بابا اللي بسببو علينا دين أكتر من 200 مليار دولار (لوقتا بكونوا صاروا) وهيدا اللي قتلوه الإسرائيليين ورجعوا عملوا محكمة ليحاكمو كم واحد واقفين ضد إسرائيل...
رح تقولولي هيك بتنزعو لإبنك؟
صح... يمكن يطلع جئم... ويمكن كون نزعتو، ويمكن ما يلاقي وظيفة بس يكبر، ويمكن ما يحبوه العالم... ويمكن يحبوه ويطلع غيفارا...
ليست هناك تعليقات:
إرسال تعليق